Мездісны Киев

…Орччӧн мыйкӧ шковмуніс. Иванлӧн синъясысь чеччыштісны бикиньяс. Сэсся воштіс садьсӧ. Паляліс госпитальын. Первой кадсӧ нинӧм эз гӧгӧрво. Кыдз бӧрыннас висьталіс орчча койка вылын куйлысьыс, тӧлысьысь дырджык тӧлкӧн абу вермӧма весиг висьтавны ассьыс нимсӧ.

Кӧть госпиталь бӧрын водзын вӧлі на уна чорыд кось, но Иван Григорьевич Опаринлы Киев мездан тышыс пыр кежлӧ колис паметяс. Ӧні на, кор казьтывлӧ сійӧ здукъяссӧ, чепӧсйӧ синваыс. Со и талун, кор воим сёрниӧ тайӧ тыш йывсьыс, ковмис корны ветеранъясӧс, медым кутчысьыштіс, газетӧ снимок вылын петіс збодерӧн.

Мыс сиктысь Иван Опаринлӧн челядьдырыс котӧртіс, кыдзи и мукӧд сиктса зонкалӧн. Кор гымыштіс Ыджыд война, муртса тырис 16 арӧс. Колхозса сьӧкыд уджын, кор ӧтлаасьӧны луныс да войыс, лэбыштіс кык воыс. Уна том зонмӧс колльӧдіс 1943 воас Вылыс Эжваса Мыс сикт. Иван неуна велӧдчыштӧм бӧрын веськаліс Первой Украинскöй фронт вылӧ, коді буретш сэки нырччис Киевлань. Веськаліс Мысса зон, кыдз шуласны, матушка-пехотаӧ, вӧлі автоматчикӧн. Чорыда ранитчытӧдз уна фашистӧс на вевъяліс водтӧдны, медым сэсся эз кыпӧдны юрнысӧ.

Дзик нин Киев дорын ёртыскӧд сяммисны мездыны быдса керка, кытчӧ вӧлі поздысьӧмаӧсь немечьяс да потшӧмаӧсь батальонлы водзӧ мунан туйсӧ. Бӧрыннас, госпитальысь петӧм бӧрын, тӧдмаліс, мый тайӧ тышын повтӧмлунсӧ пасйӧма мӧд степеня Отечественнöй война орденӧн. Победа лун Иван Григорьевичӧс суис Варшаваын нин.

Но та вылын боевöй туйяс салдатлӧн эз помасьны. Варшавасянь нуисны Германияӧ. Вит во Потсдамын видзӧдісны пӧрадок бӧрся. Ыджыд радлунӧн бергӧдчис гортӧ Иван Григорьевич. Но муртса вевъяліс пӧрччыны салдат паськӧмсӧ, корисны милициялӧн райотделӧ, шуисны, мый быть колӧ уджыштны конвойын. Сэсся 18 во вӧлі тайӧ удж вылас. Армия бӧрын регыд мысти лӧсьӧдіс семья. Первой кадсӧ овмӧдчылісны Помӧсдінӧ, сэсся вуджӧдісны Югыдъягӧ. Тані вӧлі асланыс КПЗ, кӧні ёнджыкасӧ и зілис войнаса ветеран.

80 арӧс таво мӧдас пасйыны Иван Георгиевич. Кадыс тай ассьыс босьтӧ. Унатор паметьсьыс вушйӧма нин. Но Киев вӧсна косьыс пыр кежлӧ йиджис сьӧлӧмас.

— Ёна нин висьӧдчӧ Иван бӧръя кадас, — висьталӧ кӧзяйкаыс, Агния Васильевна, кодкӧд ӧтлаын олӧны 57 во. — Весиг войнас ковмылӧ корлыны фельдшерӧс. И ӧні быд лун Енлы кевма, медым оліс на да аддзыліс Ыджыд война кусӧмсянь 60 во тыран лунсӧ. Ӧд став том кадсӧ пуктіс, медым шедӧдны тайӧ Вермӧмсӧ.

В.КИРУШЕВ.

Снимок вылын: войнаса ветеран И.Г.Опарин. Морӧсас мӧд да коймӧд степеня Отечественнöй война орденъяс, орччӧн, пызан вылын, уна медаль.

Снимок М.НЕСТЕРОВЛӦН

Парма гор, 2005, Март 29 лун (38 №).